बुलंद निश्चयातुनी स्मरेन आतला हरी
पुढ्यात ठाकली कधी कठोर संकटे जरी
परिश्रमातल्या व्यथेत नेहमी हसेन मी
हरेक संकटासवे लढेन मी लढेन मी ..
पडेन एकटा कधी असून लोक भोवती
खचायचो न मी जरी कुणी नसेल सोबती
अव्हेरत्यास , दुश्मनासही सखा म्हणेन मी
हरेक संकटासवे लढेन मी लढेन मी ..
विशाल स्वप्न पाहणे जगास वाटला गुन्हा
असा गुन्हा करेन जीवनात मी पुन्हा पुन्हा
कधी पडायचे कधी उठायचे शिकेन मी
हरेक संकटासवे लढेन मी लढेन मी ..
नशीब धीर पाहण्या असेल घेत चाचणी
कधी फुटेल हुंदका कधी भिजेल पापणी
जटील चक्रव्यूह पार सर्वदा करेन मी
हरेक संकटासवे लढेन मी लढेन मी ..
कधी नसेल चालण्यास पायवाट एकही
असून पंख कैकदा जमायची न झेपही
हजारदा पडूनही उठेन मी जगेन मी
पराभवास डावलून जिंकण्या.. लढेन मी
- संतोष वाटपाडे
No comments:
Post a Comment