Saturday, August 2, 2014

प्राजक्त...

...प्राजक्त...

प्राजक्त पहाटे फ़ुलतो
वार्‍यात असा दरवळतो
पांढरा सडा थेंबांचा
अंगणात माझ्या दिसतो..

तांबडे देठ पानेरी
पानांची किलबिल दारी
अन फ़ुले बरसती जेव्हा
गालात जरासा हसतो...

आभाळी कृष्ण ढगांची
जमलेली दिसते गर्दी
पेलून फ़ुलांना सार्‍या
प्राजक्त तसा गजबजतो...

मृदगंध पसरतो रानी
मल्हार गरजतो कानी
मातीवर टपटप ऐसा
आवाज फ़ुलांचा असतो...

पाझरते चिंब सरींनी
दारातील सारी माती
प्राजक्त झर्‍यागत अवखळ
अंगणात सार्‍या पळतो...

या धुंद पहाटे माझ्या
अंगावर काटा फ़ुलतो
बघताना वाटत असते
पाऊस कधीचा पडतो
पाऊस कधीचा पडतो......

-- संतोष वाटपाडे (नाशिक)

No comments:

Post a Comment